|
|||
Welato !(1)
Konê Reş Diyarî ji helbestvanê Amedê (Receb Dildar) re Welato ! Ji wan re bibêje ! Ji wan re bibêje ku ; Welatînî ne hêsane Welatînî , dilsozî û bargiraniye .. Welato ! Ji çiya û zinarên xwe re Bibêje ku , Mirovên çê Di deverên teng de xuyane... Welato ! Tu çih û demî .. , Hebûn û sinc û afirandinî .. Hebûna te , Hebûna welatiyên te ye ... Welato ! Tu pîvan û terazoyî Tu welatiyên çê û ne çê Ji hev cuda dikî , Pîvana welatiyên te bi te ye. Welato ! Kes nikare hêza te nasbike û Bigihêje dawiyê , Ew hêza ku di ziman û Çiyayên te de Kom bûye ; Di binax û seraxa te de Veşartiye ; Di çem û cobarên te de Diherike ; Di mêraniya xelkên te de Xuyaye ... Welato ! Xelkên cîhanê sosretmayî man , Dema ku naskirin: Zerdeşt pêxemberekî te bû ; Selaheddînê Eyûbî mirovekî te bû ; Dicle û Firat dû çemên tene Agirî û Cûdî çiyayên te ne... Ji wê hingê ve Welato , Tu di derîyekî mezin re Derbasî dîroka cîhanê bûye ... Welato ! Ziman nayêne dizîn , Kes nikare zimanê welatiyên te bidize , Ku welatiyên te li zimanê xwe Guhdar bin û lê bi xwedî derkevin, Lê ku di ser guhên xwe re avêtin û Bi zimanê biyanîyan axiftîn ; Wê hingê Welato ! Ne welatiyên te xwedî saristanîne , Ne jî zimanê wan zimanekî Bingehîne ... Welato ! Ji wan re bibêje ku; Hebûna gelan Di zimanê wan de ye .. Welato ! Ji wan re bibêje ! Ew kesên dudilî Ku bi tenê di roja xwe de Di ponijin û Li ser malê dinyayê Di nûzin ... Ku wek wan kesan Wê di nav pêlên demê de Zû winda bibin ; Dem rehmê li wan nake ... Çendî pere û avanîyên wan hebin .. Lê ew kesên ku Mal , can û tev hebûna xwe Diyarî te kirine û dikin .. Ji wan re bibêje ! Hûn mûm û findên min in , Çendî dem bi pês de here , Wê navê we bi tîpên zêrîn Di dîroka gelê Kurd de Bê nivîsandin .. Welato ! Tevî pirbûna birînên axivtî Di bedena te de ... Tu bi hêz û zexmî .. Ji ber ku tu mezinî û Ji ber ku tu mezin û zexmî Tîrên neyaran têne te û Birîn di bedena te de vedibin Belê çendî xwîn Ji wan birînan bê û biherike .. Ew xwîn xelas nabe ; Û dawî wê zora demê here , Ji ber ku hin bi hin Dem ji xwîna welatiyên te Bi çûktir dibe û Serketin nêzîk dibe .. Bê goman di wilo rewş de ; Maf jî , wê gelekî giran û buha be , Û berpirsyarî jî wê hêj buhatir be .. Vêca Welato ! Ji welatiyên xwe er bibêje ! Li tev cihên ku lê dijîn , Nefer û kom , Rewşenbîr û torevan , Siyasetvan û partîzan ku Tu welatê tevanî .. Sînga te ji tevan re Vekirîye , Çendî pir bin , têvel bin û Ne li hev bin .. Welato ! Çendî welatiyên te pir bin Di bîr û baweriyan de Têvel bin, Nîşana xêrêye , Nîşana pêşketinê ye .. Lê welato ji wan re bibêje: Kuştin ,kuştinê tîne Zikreşî ,zikreşiyê tîne Xwîn bi xwînê nayê sûstin Kuştina welatiyan Kuştina Welat e Welato..?! Ji wan re bibêje Welato ku tu; Welatê tevanî Kevin û nûyê tevanî Hebûna te ji tevan re Pîvan û terazuye , Dadgeh û dadgere..û Dawî, tu ji ramanên di serê tevan de Bilindtir û firehtirî... Welato ! Ji wan re bibêje ; Ku ne em li hev rûnên Bi mejiyê di serê xwe de Bi fikirin, Pirs û bersivên xwe Hawar û gaziyên xwe Kul û xemên xwe Ji hev re bibêjin û sanî hev bidin Ewên ku di nav xaka te de sîn dibin Em nagihêjin armanca xwe û Wê halê me ev hal bimîne ... Welato ! Ez ne bawerim ku kes karibe Pişta te bitewîne Ji welatiyên te pêve ; (kurmê darê ne ji darê be dar kurmî nabe ) bê guman ; Zerera te ji zarokên te ye Ewên;Nezan û çav girtî Ewên ku heyranê canê xwe tenê ne Welato ! Me sehnekiriye ku , Tu hêz di dinyayê de Kare welatiyên welatekî hevgirtî Bişkîne , Ku ew welatî Di bin yek gotinê de bilivin .. Û me seh nekiriye ku Tu hêzî di dinyayê de Welatiyên welatekî hevgirtî Bi hev re alîkar û hezhevkir Tewandine ... Welato ! Baweriyên te Di paşerojên nêzîk de Pir mezin in, Ew baweriyên ku Di geftûgo û Danûstandinê de Dibin yek û ew yek , Rêka aştî , azadî û serxwbûnê Bi dûv xwe de dikişîne , Çendî welatiyên te Di ramanên xwe de ... Dûrî hev û têvil bin ... Welato ! Ji wan re bibêje ! Yê ku bi rast û durist .. Welatîkî dilsoz û xemxur be .. Ew Berpirsyare .. Û ji demê re bibêje Welato ! Nivîsandin ne henek û tenazin .. Nivîsandin jî berpirsyarî ye .. Ji wan re bibêje Welato !!! Konê Reş Qamişlo |